Nunarsuaq tamakkerlugu imermik isumalluutit 10 procentii Kalaallit Nunaanni pigineqarput. Ullut tamaasa imeq minguilluinnartoq nutaarluinnaq Kalaallit Nunaata imartaannut aniasarpoq.  Imeq aput sermersuarmut ukiut 130.000-t matuma siornatigut nakkaasoq aqqutigalugu pinngorsimasoq. Sermersuup iigartartui nakkaagaangata, imerlu Kalaallit Nunaata kangerluinut Kalaallillu Nunaata imartaanut anialeraangat sermeq imerlu katersussallugit atorluassallugillu piukkunnaateqarluarput, taakkualu ima minguitsigipput taakkua aniaffianniit toqqaannartumik imerneqarsinnaasarlutik.  Imeq imaanut tarajulimmut akiliukkaangaat tarajuiassallugu akisoorujussuanngorsinnaavoq. 

Nunarsuarmi niuerfinni erngup pisariaqartinnera annertusiartuinnavippoq, Kalaallillu Nunaanni imermik piukkunnaateqarluarnerup atorluarneqarnera pisariaqartitsinermut tassunga iluaqutaasinnaavoq.  Imermut piukkunnaatit arlalippassuupput, tassami imeq minguitsoq nutaarlu imertut imigassatut assersuutigalugulu inuussutissanik tunisassiornermi imertut atorneqarsinnaavoq, kisiannili aamma tunisassiorfinni imertut akuiaatissatut, nunalerinermut imaluunniit imermik pilersuinermi akuiaatissatut atorneqarsinnaalluni.   Periarfissat amerlapput, ukiullu tamarluinnaasa imeq 2-300 milliarder tonsiusoq Kalaallit Nunaata sermersuaniit aalluni anialersarmat suliniutit annertuut mikinerusullu inissaqartinneqarput. 

Akuersissut taanna Naalakkersuisunit akuerineqartussaavoq.  Misissueqqaarnissamut akuersissutit ukiut pingasut angullugit tunniunneqarsinnaapput, kisermaassinnginnissarlu tamatigut aqqutigalugu tunniunneqartarlutik.  Piffissami tunniunneqartumi akuersissummik piginnittoq sumiiffimmi akuersissuteqarfiusumi pineqartumi nunami misissuisinnaavoq.  Piffissaq suleqatigisassanik ujarlernissamut aamma atorneqarsinnaavoq, suliffeqarfiullu niuernissamut periuserisassaa inerisaaffigalugu.  Tassani sermeq imerlu Kalaallit Nunaanniit avammut nioqqutigineqarsinnaavoq, piffissamili tassani sermeq imerlu iluanaarniutigalugu atorneqaqqusaanngillat. 

• Misissueqqaarnissamut akuersissummik pigisalik tunineqareernerup kingornagut qaqugukkulluunniit atuinissamut akuersissut pillugu qinnuteqarsinnaavoq. 
• Misissueqqaarnissamut akuersissummik tunineqarneq kingusinnerusukkut atuinissamut akuersissummik tunineqarnissamut ingerlaannaq pisinnaatitaaffeqartitsilinngilaq.

Akuersissut taanna Naalakkersuisunit akuerineqartussaavoq.  Atuinissamut akuersissut ukiut 20-t angullugit tunniunneqarsinnaavoq, katillugit ukiunut 30-nut sivitsuiffiginissaa periarfissaqartillugu.  Atuinissamut akuersissutit kisermaassassanngorlugit arlaliussassanngorlugilluunniit tunniunneqarsinnaapput.

Atuinissamut akuersissutit Kalaallit Nunaanni sermip erngullu iluanaarniutigalugit atornissaat siunertaralugu tunniunneqartartput.  Akuersissut avammut niueruteqarnissamut akuersissummik ilaqarpoq. 

2018-imiilli atuinissamut akuersissutinik pigisallit Kalaallit Nunaanni nukissiuuteqarfinniit Nukissiorfittut ittuniit imermik sinneruttumik pisisinnaanerat periarfissaasimavoq.